:: 日常二三事-涼鞋﹑昆蟲﹑小動物 ::

夏天到了，好想著涼鞋，但我好驚會比老鼠咬。

***

睇報紙，某叔叔比老鼠咬，有人責怪某部門滅鼠不力，某部門重申已放足夠的老鼠藥…
然後話老鼠咬人係食老鼠藥後的反應(！)
上月老鼠咬左腳趾公 保安員右腳再被噬
我想問，老鼠藥係咩牌子，放咩地方，點樣放，會唔會好似人咁食藥得多所以食「順」左，有無轉過其他牌子，同埋有無統計過老鼠藥殺貓殺狗多定係殺老鼠多﹖

***

琴晚，係街見到一大隻小強，好驚。
行到轉角，又有一隻差不多，又係好大隻既小強，再驚。
(其實那個size，不是「小強」了，應該叫「大強」了…)
然後我諗︰「唔通佢哋係夫妻檔出嚟搵食﹖」
又唔通會落雨﹖

***

之後反到屋企，係飯枱度整理一下d嘢，然後想攞旁邊個膠袋去掉之時…
我︰「嘩！快d攞張紙巾嚟！」
E︰「﹖」
我︰「快DDDDDDDDD」
E先生立即標過來大大力咁捉實個膠袋。
我︰「哎呀！唔好整死佢丫！」
E︰「下﹖」
但太遲了… 他的手已緊緊把膠袋捉到實一實…
不過放手之後，附在膠袋上的小甲蟲仍然好地地。可能因為牠體積太太太小了(我想大概只有1mm)，就算大大力咁握實張紙巾都握唔死佢。
如果是小強的話，我真是二話不說就會搞掂佢，但因為佢只係一隻小甲蟲，而且是黑白斑點的小甲蟲(都幾靚架！)，所以我認為佢命不該絕(！)，下旨放佢一馬。

E先生後來說︰「丫！佢D紋都幾令丫！可以搵個樽養起佢。」
我︰「你諗都唔好諗丫！」

雖則我喜歡動物，但我既愛心只限於溫血哺乳類動物(除左老鼠呀下！)(白老鼠都唔得！)。
昆蟲呀個D，睇下書呀，電視紀錄片呀咁，已經好足夠。
保持一個安全距離時，我可以好平靜咁︰「嘩！D色好靚丫！D紋好得意丫！」
但我從來唔會有興趣「見」下佢哋個「真面目」囉…