:: Happy parents ::

好多人成為父母之後，都希望有能力給下一代一個「快樂的童年」。

但其實，如果上一代都唔快樂，下一代又如何能夠快樂起來呢﹖

別說他們年紀少不知道，難道自己的父母快樂不快樂你也不知道嗎﹖

所以，要有Happy Child，首先，要成為Happy Parents。

***

做左人老豆阿媽之後

兩件小事。

我公司部LAPTOP內置左一個Cam仔。以前一直都冇用過。直到最近幾個月，用量突然大增。我成日都話，做人總係好似俾人整蠱咁，以前單身寡仔既時候，工作永遠就留響香港，想走都走唔甩。好啦，到成家立室生埋細路既時候，又偏偏飛到你嘔。

好在有互聯網。透過internet同web cam，我「總算」仲叫做可以日日見到個仔。不過，幾個月大既人仔，透過阿媽個Mon望見裡面果個不停郁身郁勢既傻佬，查實知唔知係自己老豆？

咁樣形式既「親子」，查實都係自欺欺人居多。

*****

世上既煩惱，好多時都係源於選擇。

我同老婆做左人地阿爸阿媽之後，其中一個需要選擇既，係老婆出唔出返去做野，還是疊埋心水做全職媽咪。

平心而論，呢個其實係一個happy problem。我同朋友提起呢個問題既時候，朋友串我話：「你好彩搵到下錢，老婆就話可以揀做或者唔做，大把人冇你咁好彩，兩公婆生完仔都要齊齊出黎捱先夠養家啦。你有乜好煩？」

朋友當然講得冇錯，不過呢個就係人性嘛。

我唔知算唔算係女人天生既母性，老婆話，出去做野意味住湊仔既責任要交俾家傭代勞。即使家傭其實都尚算可靠，但總覺得好似有d對個仔唔住。

當然，除此之外，仲會miss左好多見證阿仔人生既第一次。

老婆喜歡工作，這個我心裡面其實好明白。只不過針冇兩頭利，始終都要二擇其一。

我諗起，認識好多上一輩既阿爸阿媽，會怨佢地自己既仔女，令佢地人生失去左好多樂趣。佢地既埋怨同脾氣，經過多年不知不覺咁發洩左響自己既子女身上，甚至響子女既心理上做成一d陰影，即使子女長大成人依然揮之不去。

我俾老婆既建議係，如果想子女健康成長，首先要make sure佢地會有一對happy parents。假如出返去做野會令呢一個新手媽咪開心，能夠讓仔仔有一個happy mom，咁樣我諗遠比你夾硬「委屈」自己留響屋企做全職媽咪，但係變成一個唔開心既媽媽會黎得更好。親子既時間或者會少一d，不過計番條數，對阿仔我估應該會更好。

有人或者會覺得做人父母咁樣諗未免太過自私，不過我相信一樣野，就係自己都唔happy，跟本你就唔會有能力帶到快樂俾身邊既人。要人開心，首先要make sure自己唔好有委屈既感覺先得。